35 անշարժ գույք, ավելի քան 100 մլն դրամ, 400 հազար դոլար․ Էդուարդ Բաբայանի ահռելի ունեցվածքը

Ինչպես հայտնի է, այսօր Աբովյանի համայնքապետ ընտրվեց ԱԺ նախկին պատգամավոր, Գագիկ Ծառուկյանի թիկնազորի նախկին պետ Էդուարդ Բաբայանը։

MediaHub.am-ը ներկայացնում է Բաբայանի ունեցվածքը։

Բաբայանը 2021թ-ին ԱԺ պատգամավորի լիազորությունների դադարից հետո ներկայացրած հայտարարագրում, որպես անշարժ գույք, ամրագրել է 17 բնակարան, 12 ավտոտնակ, հասարակական նշանակության շինություն և հողին ամրակցված այլ շինություն։

Որպես կանխիկ գումար՝ Բաբայանը հայտարարագրել է 119,750,000 դրամ, 402,300 դոլար և 102,250 եվրո։

Հաշվետու ժամանակահատվածում Բաբայանը, որպես աշխատանքի դիմաց վարձատրություն, ստացել է 3,421,820 դրամ, ևս 11,925,000 դրամ ստացել է գույքի վարձակալության դիմաց։ Գույք օտարելուց ստացել է 25,500,000 դրամ, իսկ 810,000 դրամ՝ կենսաթոշակ։

Բաբայանի կինը՝ Նաիրա Սարգսյանը, հայտարարագրել է առանձնատուն, հողամաս և հասարակական նշանակության 2 շինություն։

2020թ-ին Սարգսյանը գնել է «Range Rover» մակնիշի ավտոմեքենա, իսկ 2021թ-ին՝ «Mercedes-Benz»։ Վերջինս, որպես եկամուտ, հայտարարագրել է 14,041,000 դրամ, որից 1,000,000 դրամը ստացել է ձեռնարկատիրությամբ զբաղվելու արդյունքում, իսկ 13,041,000 դրամը՝ գույքի վարձակալության դիմաց։

Էդուարդ Բաբայանի դուստրը՝ Լյուդմիլան, աշխատում է «Լեգալեքս» ՍՊԸ-ում և ստացել է 405,000 դրամ աշխատավարձ։

Ընդհանուր առմամբ, Բաբայանը և նրա կինը հայտարարագրել են 35 անշարժ գույք։