Ադրբեջանը ՀԱՊԿ-ում սեփական լոբբին է ձևավորում

Ադրբեջանցի պաշտոնակցի հրավերով Բաքու ժամանած Բելառուսի պաշտպանության նախարար Վիկտոր Խրենինին ընդունել է նախագահ Իլհամ Ալիևը։

Ըստ պաշտոնական հաղորդագրության, Ալիևը գոհունակություն է հայտնել Բելառուսի և Ադրբեջանի միջև ռազմական ոլորտում համագործակցության կապակցությամբ, որը «հաջողությամբ շարունակվում է»։

Նշենք, որ Բելառուս-Ադրբեջան հարաբերությունների հիմքում ընկած են տնտեսական, էներգետիկ, ռազմա-քաղաքական շահեր: Բելառուսը ցանկանում է նվազեցնել իր նավթագազային մեծ կախվածությունը ՌԴ-ից և այս առումով հենվում է էներգակիրներով հարուստ Ադրբեջանի վրա: Մինսկը տարիներ շարունակ խորացրել է նաև ռազմական, ռազմատեխնիկական կապերը Բաքվի հետ՝ Պոլոնեզ համակարգերի վաճառքն Ադրբեջանին դրա վառ ապացույցն է:

Բելառուսի համար Ադրբեջանը վճարունակ գնորդ է և Մինսկը պատրաստ է շարունակել ռազմական արտադրանք վաճառել Ադրբեջանին՝ չնայած հայ-ադրբեջանական հակամարտությանը:

Հիշեցնենք, որ ՀՀ-ն ու Բելառուսը՝ ՀԱՊԿ-ի անդամ-պետություններ են:

Ինչ վերաբերում է Ադրբեջանի հետաքրքրություններին, ապա տնտեսական, էներգետիկ բաղադրիչին զուգահեռ Բաքուն ցանկանում է գնել զինատեսակներ նաև հետխորհրդային տարածքից՝ ունենալով այլընտրանք նաև ռուսական, ուկրաինական ռազմական արտադրանքին: Ադրբեջանի ղեկավար Իլհամ Ալիևը խորացնում է էներգետիկ, ռազմաքաղաքական կապերը ՀԱՊԿ-ի անդամ մի շարք երկրների հետ՝ Բելառուս, Ղազախստան, ինչը նաև այդ կազմակերպությունում ՀՀ-ի դիրքերի թուլացման ու ազդեցության նվազեցման նպատակներ է հետապնդում: Ի դեմս Բելառուսի և Ղազախստանի, Բաքուն ցանկանում է ՀԱՊԿ-ում ունենալ սեփական լոբբիստներին:

ՀՀ-ն այս պարագայում որևէ լուրջ լծակներ չունի ազդելու երկու սուվերեն երկրների՝ Բելառուսի և Ադրբեջանի հարաբերությունների խորացման վրա միակ տարբերակը հայ-բելառուսական հարաբերությունների խորացումն է այդ թվում տնտեսական, ռազմական, ներդրումային, որպեսզի բալանսավորվեն Մինսկ-Բաքու կապերը:

Բելառուսն ու ՀՀ-ն ԵԱՏՄ-ի անդամ են և երկկողմ տնտեսական նախագծերը կարող են նոր լիցք, նոր շունչ տալ երկկողմ կապերին:

Վերլուծությունը՝ Արտյոմ Բալասանովի