«BBC»-ի ռուսական ծառայությունը պատմում է ադրբեջանական գերությունում գտնվող զինծառայողների մասին

«Ծեծում ու ծաղրում են, բայց ինձ մոտ ամեն ինչ լավ է». «BBC»-ի ռուսական ծառայությունը պատմում է ադրբեջանական գերությունում գտնվող զինծառայողների մասին

Համաշխարհային «BBC» լրատվական գործակալության ռուսական ծառայությունը զրուցել է ադրբեջանական գերությունից վերադարձած զինվորների և քաղաքացիական անձանց ու դեռևս գերության մեջ գտնվող զինվորների հարազատների հետ:

Ներկայացված են տարբեր ճակատագրեր, որոնք պատկերում են ադրբեջանական գերության ծանր օրերն ու տանջանքները և նրանց հարազատների ապրումները` Հայաստանում:

Հրապարակված հոդվածում նշվում է, որ արդեն մի քանի ամիս է, ինչ հայ զինծառայողները գտնվում են ադրբեջանական գերության մեջ: Նրանք տուն նամակներ են գրում, որ իրենց հետ ամեն ինչ լավ է, սակայն նրանք, ում հաջողվել է վերադառնալ Հայաստան, պատմում են մշտական ծեծի անմարդկային վերաբերմունքի մասին: Զինվորների հարազատները մի բան են խնդրում. հայրենիք վերադարձնել իրենց ամուսիններին, որդիներին և եղբայրներին: Հոդվածագիրը շեշտում է. իրավիճակը միանշանակ չէ. Ադրբեջանում պահվող անձանց չեն համարում ռազմագերիներ` նրանց մեղադրելով տարբեր հանցագործություններ կատարելու մեջ:

Հոդվածագիրը Հայաստանում զրուցել է Շիրակի մարզի Լանջիկ գյուղից գերության մեջ գտնվող Սեդրակ Սողոմոնյանի հոր` Սամվել Սողոմանյանի հետ: 26-ամյա Սեդրակը հրադադարի հայտարարության ստորագրման պահին տանն է եղել: Հրադադարից հետո մեկնել է հերթափոխի` Հադրութի շրջանի Հին Թաղեր գյուղում, որտեղից էլ օրեր անց գերի վերցվել:

Գերությունից վերադարձածների մյուս պատմությունների մասին` ««Бьют, издеваются, но у меня все хорошо». Что рассказывают вернувшиеся из азербайджанских тюрем армянские военные» հոդվածում: