Ադրբեջանը պատերազմի արդյունքներից փորձում է ստանալ մաքսիմալ քաղաքական դիվիդենտներ

ԱՊՀ անդամ երկրների ղեկավարների խորհրդի առցանց նիստի ժամանակ Ադրբեջանի նախագահ Իլհամ Ալիևը կարևոր մեսիջներ է հղել, որոնք արտացոլում են Բաքվի դիրքորոշումն Արցախյան հարցի վերաբերյալ, ինչպես նաև այդ երկրի ռազմավարությունը մոտակա տարիների համար:

Ալիևն Արցախյան հարցը համարում է լուծված՝ ռազմաքաղաքական ճանապարհով, այսինքն՝ Բաքվի համար այլևս Արցախյան հարց՝ Արցախի կարգավիճակի հարց գոյություն չունի: Դա մեսիջ է Մինսկի խմբին, այդ թվում՝ ՌԴ-ին, որն Արցախում ներկայացված է իր խաղաղապահ ուժերով: Բացի այդ, Ադրբեջանը հայկական կողմին մեղադրեց մզկիթները ոչնչացնելու համար՝ դրանով ցանկանալով հրահրել հակահայկական տրամադրություններ մահմեդական երկրներում, որտեղ առկա են հայկական համայնքներ: Ալիևն այդ մեսիջով Արցախյան հարցին կրկին փորձեց տալ կրոնական երանգ․ այդպիսի հայտարարություններով Ադրբեջանի քաղաքական ղեկավարությունը հանդես է եկել տասնամյակներ շարունակ:

Ադրբեջանի նախագահը, անդրադառնալով հայ ռազմագերիների հարցին, նշեց, որ Բաքուն բոլոր ռազմագերիներին վերադարձրել է Հայաստանին, իսկ Բաքվում պահվող հայկական բանակի զինվորներին անվանեց «դիվերսանտներ»: Դա նշանակում է, որ Ադրբեջանը չի պատրաստվում վերադարձնել հայ ռազմագերիներին՝ նրանց օգտագործելով որպես լծակ՝ Երևանից ականապատ տարածքների քարտեզները կորզելու համար:

Դրան զուգահեռ, Ալիևը ՀՀ-ին ու Իրանին մեղադրել է թմրամիջոցների լոգիստիկա ստեղծելու համար: Ալիևի հակաիրանական մեսիջը կապ ունի Թեհրանի վերջին զորավարժությունների, Ադրբեջանի դեմ ուղղված հայտարարությունների հետ: Իրանը հստակ նշել է, որ թույլ չի տա թուրք-ադրբեջանական տանդեմին փոխել ՀՀ-ի սահմանները՝ օկուպացնել Սյունիքը: Ադրբեջան-Իրան հակասությունները գնալով սրվում են․ Ալիևի հակաիրանական հռետորաբանությունը կոշտանալու է, ինչը պայմանավորված է Ադրբեջան-Թուրքիա-Իսրայել ռազմաքաղաքական սերտ կապերով, ինչպես նաև Հայաստանի հանդեպ Իրանի բարեկամական դիրքորոշմամբ:

Ալիևի մեսիջները խոսում են այն մասին, որ Բաքուն շարունակելու է զինվել՝ պատրաստվել Արցախի գրավմանը զենքի ուժով, իսկ ռուս խաղաղապահների ներկայությունն Արցախում, ըստ Ալիևի, ժամանակավոր է: Ադրբեջանը պահանջելու է ՀՀ-ից ճանաչել Ադրբեջանի տարածքային ամբողջականությունը՝ Արցախը թողնելով Ադրբեջանի կազմում, ինչպես նաև հրաժարվելով Նախիջևանից: Բաքուն ցանկանում է 44-օրյա պատերազմի ռազմական հաջողություններից ստանալ մաքսիմալ քաղաքական, գեոպոլիտիկ, տարածքային դիվիդենտներ՝ այդ թվում Սյունիքով միջանցք ստանալու տեսանկյունից:

Հայաստանն ու Արցախը պետք է ՌԴ-ի միջոցով վերազինեն բանակը, կառուցեն արդի տնտեսություն, բարձրացնեն Արցախի ՊԲ-ի մարտունակությունն ու պատրաստվեն արցախյան նոր պատերազմին, քանի որ Ադրբեջանը երբեք չի հրաժարվելու ամբողջ Արցախը գրավելու մտքից, ինչպես նաև տարածքային նկրտումներից Հայաստանի հանդեպ՝ առաջին հերթին աչքի տակ ունենալով Սյունիքը։

Արտյոմ Բալասանով