Մեծ Բրիտանիան կես միլիոն ֆունտ կհատկացնի Արցախում ականազերծման աշխատանքների համար

Միացյալ Թագավորությունը կես միլիոն ֆունտ ստերլինգ է հատկացրել Արցախում և Արցախի շուրջ ականազերծման աշխատանքներին աջակցելու նպատակով:

«Արմենպրես»-ի փոխանցմամբ, ՄԱԿ-ի զարգացման ծրագրին հատկացված գումարների միջոցով վերապատրաստվելու են համապատասխան մասնագետներ, որոնք օգնելու են ականազերծմանը և Արցախում ու Արցախի շուրջ տարածքներն անվտանգ դարձնեն մարդկանց համար:

«Արցախում ու Արցախի շուրջ գտնվող տարածքներն աշխարհում ամենաականապատ հատվածներից են, ինչի հետևանքով շատ հաճախ քաղաքացիական անձինք են մահանում կամ կենսագործունեության համար վտանգավոր վնասվածքներ ստանում:

Միացյալ Թագավորության նվիրատվության շնորհիվ կօգտագործվի ՄԱԿ-ի փորձառությունը՝ նվազեցնելու Հայաստանում և Ադրբեջանում քաղաքացիական կյանքին սպառնացող վտանգը՝ համապատասխան ուսուցում և տեխնիկական ականազերծման աջակցություն տրամադրելով նրանց, ովքեր այդ տարածքներն ավելի անվտանգ են դարձնում:

Սակայն առջևում անելիքները շատ են»,- նշել է Միացյալ Թագավորությոան Եվրոպական հարևանության և Ամերիկայի հարցերով նախարար Ուենդի Մորթնը:

Միացյալ Թագավորությունը կոչ է արել մյուս երկրներին աջակցելու ՄԱԿ-ի նախաձեռնությանը՝ օգնելու հակամարտության հետևանքով տուժած հազարավոր մարդկանց: