Արցախի ԱԺ հատուկ նիստը մեկնարկեց միջադեպով․ ՀՀ ղեկավար կազմից որևէ ներկայացուցիչ չկա

Այս պահին Արցախի Ազգային ժողովում անցկացվում է Արցախի Հանրապետության անկախության հռչակման տոնին նվիրված հատուկ նիստը: Հայաստանի ղեկավար կազմից որևէ ներկայացուցիչ չկա․ վարչապետ Նիկոլ Փաշինյանն արձակուրդում է, ԱԺ նախագահ Ալեն Սիմոնյանը գործուղվել է Վիեննա, իսկ նախագահ Արմեն Սարգսյանի մասին վերջին տեղեկությունն այն է, որ օգոստոսի 9-ին մեկնել է արձակուրդ, որի մի մասը կանցկացնի Հայաստանում, մյուսը՝ արտերկրում, սակայն արձակուրդի մանրամասները հայտնի չեն՝ որքան է տևելու և որ երկրում է գտնվելու։

Արցախից MediaHub.am-ի թղթակցի փոխանցմամբ՝ Արցախի ԱԺ նիստում Հայաստանն այս պահին ներկայացված է ՀՀ ԱԺ խմբակցությունների ներկայացուցիչների մակարդակով։ Արցախի խորհրդարանը նախապես քանակական սահմանափակում էր դրել․ մասնավորապես՝ ընդհանուր առմամբ 11 հոգի կարող էր մասնակցել Արցախի ԱԺ հատուկ նիստին` 7 հոգի իշխանական ՔՊ խմբակցությունից, 3 պատգամավոր` «Հայաստան»-ից, 1 պատգամավոր` «Պատիվ ունեմ» խմբակցությունից:

Արցախի ԱԺ հատուկ նիստի մեկնարկին միջադեպ տեղի ունեցավ․ մասնավորապես՝ ՀՀ ԱԺ խմբակցությունների ներկայացուցիչների սահմանափակումներով պայմանավորված՝ խառնաշփոթ ստեղծվեց, ինչի արդյունքում «Հայաստան» դաշինքից 3 պատգամավորի փոխարեն նիստերի դահլիճ մտավ 11 պատգամավոր։

«Պատիվ ունեմ» դաշինքից նիստին ներկա է միայն խմբակցության ղեկավար Արթուր Վանեցյանը, թեև այս պահին Արցախում է նաև դաշինքի պատգամավոր Տիգրան Աբրահամյանը։

Իշխող խմբակցությունից ներկա է 7 պատգամավոր, որոնց թվում են ՀՀ ԱԺ փոխխոսնակ Ռուբեն Ռուբինյանը, ԱԺ պաշտպանության հանձնաժողովի նախագահ Անդրանիկ Քոչարյանը, ԱԺ Պետական-իրավական հարցերի մշտական հանձնաժողովի նախագահ Վլադիմիր Վարդանյանը, ԱԺ ՔՊ խմբակցության ղեկավար Հայկ Կոնջորյանը, սյունեցի պատգամավոր Արմեն խաչատրյանը, եզդի համայնքի ներկայացուցիչ Ռուստամ Բաքոյանը և Հայկ Ցիրունյանը։