ԵՄ-ն 2,6 մլրդ եվրո կհատկացնի Հայաստանին կոմունիկացիաներ ստեղծելու համար. Եղոյան

ԵՄ-ն առաջիկա հինգ տարիներին Հայաստանում մոտ 2,6 մլրդ եվրոյի ներդրում կիրականացնի: Այդ մասին այսօր Հանրային հեռուստաընկերության եթերում Պետրոս Ղազարյանի հետ հարցազրույցի ժամանակ ասաց ԱԺ «Իմ քայլը» խմբակցության պատգամավոր Արման Եղոյանը:

Նրա խոսքով՝ այդ գումարը հենց այնպես չի տրվում, գումար, սովորաբար, տալիս են բարեփոխումների դիմաց:

«ԵՄ-ն ցանկանում է իր անմիջական հարևանությամբ ունենալ կանխատեսելի քաղաքականությամբ, կայուն երկրներ: Մենք համարվում ենք ԵՄ հարևանությամբ գտնվող երկիր, և ցանկացած տուրբուլենտություն դեպի ԵՄ տարածվելու ռիսկ ունի»,- նկատեց նա:

Ըստ Արման Եղոյանի՝ ԵՄ-ն նաև հետաքրքրվածություն ունի տարածաշրջանում ունենալ զարգացած կոմունիկացիաներով, անխափան տրանսպորտային կապեր ունեցող հարևաններ:

«2018 թվականին ՀՀ-ին տրամադրվող աջակցությունը ԵՄ ֆոնդից ավելացվեց մոտ 20 մլն եվրոյով, ապա քովիդի ժամանակ Հայաստանին տրամադրվեց մոտ 96 մլն եվրո, և նոր ծրագրով տարեկան տրամադրվող 65 մլն եվրոյին ավելանալու է նաև այս գումարը»,- ասաց Արման Եղոյանը:

Նա տեղեկացրեց, որ նման ներդրումային ծրագիր ԵՄ-ն իրականացնում է նաև հարևան Վրաստանում: