Փոխգնդապետ Արսեն Ղազարյանը կալանավորվեց
- Sep 14, 2021
- 1 min read
Դատարանը բավարարեց քննիչի միջնորդությունը․ փոխգնդապետ Արսեն Ղազարյանը կալանավորվեց։ Այդ մասին MediaHub-ի հետ զրույցում ասաց փաստաբան Վահան Հովհաննիսյանը, ապա հավելեց, որ այս սցենարն իր համար կանխատեսելի էր։
Ավելի վաղ հայտնել ենք, որ փոխգնդապետ Արսեն Ղազարյանին մեղադրանք է առաջադրվել Արցախի Մեծ Թաղեր և Խծաբերդ հատվածները թշնամուն հանձնելու և մի քանի տասնյակ զինվորականների գերի ընկնելու մեջ։
Չնայած այն բանին, որ մի քանի գերեվարված տղաներ իրենց հարցաքննության մեջ նշել են, որ փոխգնդապետը մեղավոր չէ, իսկ ինչպես փաստաբանն է պնդում, որևէ հիմք չկա նրան մեղադրելու, Ղազարյանը կալանավորվել է։
«Որոշման մեջ որևէ հիմնավորում նշված չէ, ասեմ ավելին, Արսեն Ղազարյանը գտնվում է «Արմենիա» ԲԿ-ում ստանում է ստացիոնար բուժում և վաղը պետք է տեղափոխվի քրեակատարողական հիմնարկ»,- ասաց Վահան Հովհաննիսյանն ու հավելեց, որ վաղը բողոք կներկայացնի Վերաքննիչ դատարան։
Ըստ Հովհաննիսյանի՝ դատավոր Գագիկ Պողոսյանը քննիչի միջնորդությունը բավարարել է «պետպատվերի» շրջանակներում։
«Դա պարզ էր դատավորի և՛ հարցերից, և՛ կողնորոշումից»,- ասաց Հովհաննիսյանը։
Comments