Նրանք, ովքեր փոս են փորում իրենց եղբայրների համար, իրենք կընկնեն այդ փոսի մեջ․ Այաթոլլա Ալի Խամենեին

Իրանի հյուսիս-արևմուտքում, որոշ հարևան երկրներում տեղի ունեցող իրադարձություններըը պետք է կարգավորվեն օտարերկրացիների ներկայությունը կանխելու ճանապարհով։ Այս մասին հայտարարել Է ԻԻՀ գերագույն առաջնորդ Այաթոլլա Ալի Խամենեին ՝ տեսակապով ելույթ ունենալով ԻԻՀ ԶՈւ սպայական բուհերի շրջանավարտների միջոցառման ժամանակ։ Հաղորդում է irna-ն։

«Երկրի հյուսիս-արևմուտքում տեղի ունեցած վերջին իրադարձությունները պետք է լուծվեն առանց միջամտության և օտարերկրյա բանակների ռազմական ներկայության։ Նրանք, ովքեր փոս են փորում իրենց եղբայրների համար, նախ իրենք կընկնեն այդ փոսի մեջ»։

Առաջնորդը հայտնել է նաև, որ երկրի անվտանգությունը բոլոր ոլորտների առաջընթացի հիմքն է․ «Նա, ով կարծում է, որ կարող է իր անվտանգությունն ապահովել մյուսի վրա հենվելով, թող իմանա, որ շուտով նրան դրա համար ապտակ է սպասվում»։

Խամենեի խոսքով ՝ Իրանի զինված ուժերի համբավը կայանում է նրանում, որ նրանք որպես ամրոց են ծառայում երկրի և ժողովրդի համար: Նա նշել է, որ տարածաշրջանում օտարերկրյա բանակների, այդ թվում՝ ԱՄՆ-ի զինված ուժերի ներկայությունը, ապակառուցողական և սադրիչ:

«Տարբեր սպառազինությամբ հագեցած ԱՄՆ բանակը ներխուժեց Աֆղանստան ՝ թալիբներին տապալելու համար։ 20 տարի նրանք սպանել ու հանցագործություններ են կատարել այդ երկրում։ 20 տարի անց նրանք իշխանությունը տվեցին թալիբներին և դուրս բերեցին իրենց զորքերը։ Օտար զինված ուժերի, այդ թվում ՝ Ամերիկայի ներկայությունը մեր տարածաշրջանում քայքայման գործոն է հանդիսանում։ Բոլորը պետք է աշխատեն, որպեսզի պետությունները լինեն ինքնիշխան, բանակները պետք է լինեն անկախ, հենվեն ժողովրդի վրա և համագործակցեն հարևան երկրների բանակների հետ։ Դրանում է տարածաշրջանի շահը», - հիշեցրել է առաջնորդը։