Զաքարյանին և Սարգսյանին ազատ արձակելու պահանջով Վարդևանյանի դիմումն ընթացքի մեջ է. դատախազություն

ԱԺ պատգամավորի մանդատ ստացած Մեղրիի նախկին համայնքապետ Մխիթար Զաքարյանին և Սիսիանի համայնքապետ Արթուր Սարգսյանին ազատ արձակելու պահանջով «Հայաստան» դաշինքի անդամ, փաստաբան Արամ Վարդևանյանի դիմումը դատախազությունը ստացել է։ Այս մասին այսօր՝ հուլիսի 28-ին, NEWS.am-ի հետ զրույցում հայտնել է ՀՀ գլխավոր դատախազի խորհրդական Գոռ Աբրահամյանը։

«Դիմումը քննարկման փուլում է, սահմանված ժամկետում՝ հինգ օրվա ընթացքում, պատասխանը կուղարկվի իրեն»,- նշել է նա։

Հուլիսի 26-ին, «Հայաստան» դաշինքի անդամ, փաստաբան Արամ Վարդևանյանը դիմում էր ներկայացրել Դատախազություն՝ պատգամավորներ, Մեղրիի նախկին համայնքապետ Մխիթար Զաքարյանին և Սիսիանի համայնքապետ Արթուր Սարգսյանի նկատմամբ կալանքը վերացնելու և նրանց անհապաղ ազատ արձակելու վերաբերյալ։