Արցախում նախատեսվում է զարկ տալ էկոտուրիզմին
- Jun 4, 2021
- 1 min read
Արցախի Հանրապետության էկոնոմիկայի և գյուղատնտեսության նախարարության Զբոսաշրջության վարչությունը Արցախյան 44-օրյա պատերազմից հետո ուսումնասիրություններ է իրականացնում և աշխատանքներ է տանում երկրում զբոսաշրջային այլընտրանքային ուղղություններ ստեղծելու համար:
«Պատերազմից հետո Արցախի հիմնական զբոսաշրջավայրերի 80 տոկոսն այս պահին Ադրբեջանի կողմից օկուպացված է, սակայն չի նշանակում, որ մենք կորցրել ենք մեր ներուժը: Կան բազմաթիվ վայրեր, որոնք ունեն զբոսաշրջային մեծ ներուժ, և Արցախի Հանրապետությունը, ի դեմս Զբոսաշրջության վարչության, աշխատում է այլընտրանքային ուղղություններ ստեղծելու համար»: Այս մասին խոսեց ԱՀ զբոսաշրջության վարչության պետ Գևորգ Առաքելյանը:
Նրա խոսքով՝ արդեն իսկ մշտադիտարկումներ են իրականացվել, կազմակերպվել են ճանաչողական այցեր դեպի այլընտրանքային ուղղություններ: Դրանցից Առաքելյանը նշեց Պատարա-Ծմակահող-Քոլատակ-Վանք գյուղ ուղղությունը:
ԱՀ զբոսաշրջության վարչության պետն ընդգծեց, որ իրենք նախատեսում են զարկ տալ էկոտուրիզմին և գյուղատնտեսական զբոսաշրջությանը, քանի որ երկրում կա մեծ ներուժ:
Comments