Մեկուկես տարի ոչ մի մրցաշար չունեինք, և ես կարոտել էի շախմատը. Էլինա Դանիելյան

Հայաստանի շախմատի կանանց հավաքականի անդամ, Եվրոպայի նորընծա չեմպիոն Էլինա Դանիելյանը վերջին հաջողությունը կապում է նրա հետ, որ ինքը կարոտել էր շախմատը քովիդով պայմանավորված դադարի պատճառով: Լրագրողների հետ հանդիպման ժամանակ այդ մասին ասաց Դանիելյանը:

«Չգիտեմ, թե ինչպես ստացվեց այս տարի, գուցե նրանից է, որ մեկուկես տարի ոչ մի մրցաշար չունեինք, և ես կարոտել էի շախմատը»,- ասաց նա:

Հայաստանի կանանց հավաքականի առաջատար, գրոսմայստեր Էլինա Դանիելյանը հռչակվել է Եվրոպայի կանանց 2021 թվականի չեմպիոն՝ 11 հնարավորից հավաքելով 9 միավոր: Դանիելյանը վերջին տուրում հաղթեց Էստոնիան ներկայացնող Նարվա Մային: Այս հաղթանակը նորանկախ Հայաստանի պատմության մեջ առաջին նմանատիպ հաջողությունն է թե՛ կանանց, թե՛ տղամարդկանց շրջանում: