Գիշերը մի քանի ժամ թշնամին կրակել է Գեղամասարի ուղղությամբ․ համայնքի ղեկավար

Գիշերը Գեղարքունիքի մարզի Գեղամասար խոշորացված համայնքի ուղղությամբ ադրբեջանական կողմը կրակոցներ է արձակել։ Այդ մասին MediaHub.am-ի հետ զրույցում ասաց Գեղամասար խոշորացված համայնքի ղեկավար Հակոբ Ավետյանը։

«Ադրբեջանցիները մի քանի ժամ հրաձգային զինատեսակներից կրակել են։ Կրակել են հրաձգային զինատեսակներից, ծանր տեխնիկա չի աշխատել, որքանով ես եմ տեղյակ»,- ասաց Ավետյանը։

Կրակոցները եղել են Կութի, Սոթքի ուղղություններով։

«Կրակոցները դադարել են գիշերը ժամը 3-ի սահմաններում, մոտավորապես այն ժամանակ, երբ դադարել են Երասխում։ Կարծում եմ, որ դա պատահական չէ՝ մեկը մյուսի հետ կապված է, նրանք հրահրում են»,- ասաց նա։

Ավետյանը նշեց, որ կրակոցներն անհետևանք են մնացել՝ զոհեր և վիրավորներ չկան։ Այս պահին հանգիստ է։

Արմինե Նավոյան