Իրանի ԱԳՆ-ն պատասխանել է Ալիևին
Իրանի արտգործնախարարության պաշտոնական խոսնակ Սայիդ Խաթիբզադեն հայտարարել է, որ Իրանի հյուսիս-արևմուտքում զորվարժությունների անցկացումն ինքնիշխանության հարց էր և որ Իրանի Իսլամական Հանրապետությունը չի հանդուրժի իսրայելական ռեժիմի ներկայություն իր սահմանների մոտ․ գրում է irna.ir-ը:
Ադրբեջանի նախագահ Իլհամ Ալիևի՝ Իրանի հյուսիս-արևմուտքում զորավարժությունների թեմայով արած հայտարարությունների մասին հարցին ի պատասխան՝ մամուլի խոսնակը նշել է, որ զարմանալի էր, թե ինչպես է Ադրբեջանի նախագահն արտահայտել իր դիտարկումները, քանի որ երկու երկրները լավ, հարգալից հարաբերություններ և ամենաբարձր մակարդակներում շփման նորմալ եզրեր ունեն:
Խաթիբզադեն ասել է, որ Իրանի և Ադրբեջանի արտաքին գործերի նախարարները լրջորեն և սերտորեն քննարկել են այս և այլ հարցեր՝ Նյու Յորքում ՄԱԿ-ի Գլխավոր վեհաժողովի շրջանակում կայացած հանդիպմանը: Ըստ խոսնակի՝ բարձրաստիճան դիվանագետները համաձայնել են շարունակել բանակցությունները պատշաճ պայմաններում:
«Իրանի Իսլամական Հանրապետությունը միշտ մերժել է ցանկացած տեսակի տարածքային օկուպացիա և ընդգծել է երկրների տարածքային ամբողջականության և միջազգայնորեն ճանաչված սահմանները հարգելու անհրաժեշտությունը»,- ընդգծել է Խաթիբզադեն:
Comments