Քաբուլում քաոսն անխուսափելի է. Ջո Բայդեն

Քաբուլում քաոսն անխուսափելի է: Այդ մասին հայտարարել է ԱՄՆ նախագահ Ջո Բայդենը՝ խոսելով Աֆղանստանում տեղի ունեցած վերջին իրադարձությունների մասին, հայտնում է «Ամերիկայի ձայնը»:

Բայդենի խոսքով` ամերիկյան ստորաբաժանումները տեղակայված են լինելու Քաբուլում, քանի դեռ ԱՄՆ բոլոր քաղաքացիները չեն տարհանվել այնտեղից, նույնիսկ, եթե զինվորականները ստիպված լինեն սպասվածից ավելի երկար մնալ Աֆղանստանի` թալիբների վերահսկողության տակ գտնվող մայրաքաղաքում:

Նա հիշեցրել է՝ գարնանը հայտարարել էր, որ Աֆղանստանից ամերիկյան զորամիավորումների դուրսբերման վերջնաժամկետն օգոստոսի 31-ն է:

Այդուամենայնիվ, նա խոստովանել է, որ ամերիկացի զինվորներն, անհրաժեշտության դեպքում, կարող են ավելի երկար մնալ երկրում, որպեսզի այնտեղից տարհանեն յուրաքանչյուր ամերիկացու:

«Եթե այնտեղ ամերիկացի քաղաքացիներ մնան, մենք ևս կմնանք՝ բոլորին դուրս բերելու համար»,- ասել է Բայդենը:

Նախագահը չի հստակեցրել, թե որքան ժամանակ կարող է հետաձգվել Աֆղանստանում ամերիկյան ռազմական ներկայությունը: