Կապանի թանգարանին փոխանցված գանձը ապացույցն է այն բանի, որ Սյունիքը կանգուն է եղել ու կմնա․ հնագետ

«Սյունիքը՝ քաղաքակրթությունների միջնաբերդ» համաժողովի մասնակիցները՝ հնագետ, հայագետ, արվեստագիտության դոկտոր Հակոբ Սիմոնյանի գլխավորությամբ, Կապանի երկրագիտական թանգարանին փոխանցեցին սյունեցի զինվորի բրոնզե արձանիկը։

Արձանիկը թվագրվում է մ.թ.ա. 9-6-րդ դարերով (Վանի թագավորության ժամանակաշրջան)։

Քաջ ու հզոր հայ զինվորի կերպարը խորհրդանշող զինվորի մի ձեռքում վահանն է, մյուս ձեռքում՝ դաշույնը։

Արձանիկը 2016 թվականից Երևանում էր` ՀՀ ԿԳՄՍՆ պատմամշակութային ժառանգության գիտահետազոտական կենտրոնում, որտեղ էլ մասնագետները գտածոն ուսումնասիրել և վերականգնել են։

Հնագետ Հակոբ Սիմոնյանի խոսքով՝ այս անգին գանձը ապացույցն է այն բանի, որ Սյունիքը կանգուն է եղել ու կմնա, քանի որ հնագույն ժամանակներից մինչև այսօր ունի այսպիսի քաջարի զավակներ։