«Հպարտությունը չի վերաբերել պարտություն կրելուն»․ Լիլիթ Մակունցը մեկնաբանեց Նիկոլ Փաշինյանի խոսքերը
Քաղաքացիները դիտել են այդ տեսանյութը և հստակ տեսել, որ երկու հատվածներն ու երկու նախադասությունները վերաբերում են տարբեր կոնտեքստների։ Հպարտությունը վերաբերել է նրան, որ մենք հպարտանում ենք մեր զինվորներով, որոնք ի հեճուկս ամենադաժան պատերազմի կարողացել են պահել Արցախը թեկուզ վիրավոր և պահել ՀՀ սահմանները։ Այս մասին խորհրդարանական ճեպազրույցների ժամանակ ասաց ԱԺ «Իմ քայլը» խմբակցության ղեկավար Լիլիթ Մակունցը՝ անդրադառնալով Փաշինանի՝ մայիսի 30-ին հնչեցրած հետևյալ արտահայտությանը՝ «Հպարտ եմ, այո՛ մենք պարտվել ենք, և այդ պարտության պատասխանատվությունը մերն է»։
«Այսօր այնպիսի առաջատար երկրներ, ինչպիսին Գերմանիան է, վերանայում է իր ռազմական քաղաքականությունը՝ մեջբերելով և հիմնվելով ղարաբաղյան պատերազմի դրսևորումների վրա։ Խոսքը սրա մասին էր, իսկ պարտության վերաբերյալ բոլորովին այլ կոնտեքստ էր։ Տեսանյութում հստակ երևում է։ Քաղաքական այն շրջանակները, որոնք փորձում են մանիպուլացնել, դա բնորոշ է իրենց գործելաոճին»,-նշեց պատգամավորը։
Comments