Ադրբեջանը ենթադրել է, որ Հայաստանի կողմից համարժեք պատասխան չի լինելու. Մարգարով
Ադրբեջանը ենթադրել է, որ այն երկրի կողմից, որի տարածք ներխուժել են, չի լինի այնպիսի արձագանք, որը կստիպի իրենց զղջալ՝ կատարածի համար։ Այս մասին «Փաստինֆո»-ի հետ զրույցում ասաց քաղաքագետ Ալեքսանդր Մարգարովը՝ անդրադառնալով ադրբեջանցիների կողմից ՀՀ սուվերեն տարածք ներխուժելուն։
Ըստ նրա՝ այս քայլերով Ադրբեջանը, ըստ էության, շարունակում է այն գործողությունները, որոնք սկսվել են 2016 թվականի ապրիլին և շարունակվել 2020 թվականին:
«Ադրբեջանն իր գործողություններով իրականացնում է այն, ինչը նախկինում ներկայացնում էին հայտարարությունների տեսքով։ Այսինքն՝ հայտարարում էին, որ կլուծեն Ղարաբաղի խնդիրը, թե Սյունիքը եւ Երևանը իրենց տարածքն է։ Եւ հիմա Բաքուն աստիճանաբար ստուգում է Երեւանի հնարավոր պատասխանը եւ փորձում իրականացնել իր քաղաքական ծրագիրը»,- շեշտել է քաղաքագետը՝ նշելով, որ դրա շարժառիթները տարբեր են։ Օրինակ՝ Ադրբեջանը ցանկանում է ընդլայնել իրենց ազդեցությունը, իրականացնել ավելի երկարատև պլանները՝ կապված պանթյուրքիստական ծրագրի հետ, ազդել Հայաստանի քաղաքականության վրա և ցույց տալ սեփական նշանակությունը տարածաշրջանում:
Նրա գնահատմամբ՝ Հայաստանի կողմից իրականացվող քայլերն այնքան էլ համարժեք չեն ադրբեջանցիների գործողություններին եւ այն փաստը, որ Ադրբեջանը գնացել է նման սադրանքների, վկայում է այն մասին, որ նրանք Երեւանից սպասում էին հենց բավականին թույլ արձագանք։
Քաղաքագետն արձանագրել է, որ ցանկացած պետության տարածքային ամբողջականություն խախտվելու դեպքում այդ երկիրն արձագանքում է դրան՝ անվտանգային գործառույթի շրջանակներում:
«Եթե մենք այս դրույթը ընդունենք որպես հիմք, ապա կնկատենք, որ լիարժեք պատասխան առայժմ չեն ցուցաբերել: Մյուս կողմից փորձում ենք իրականացնել գործողություններ, որոնք ցույց կտան իրենց պատրաստակամությունը անդրադառնալ այս հարցին: Առայժմ դա ստացվում է այլ մարդկանց ներգրավվածությամբ, այլ կառույցներին դիմելով: Պետությունը պետք է ունենա պոտենցիալ, որ ոչ մեկը չփորձի իրականացնել այսպիսի քայլեր: Բայց եթե նման բան տեղի է ունեցել, ուրեմն սպասվում է, որ պատասխանը լինելու է շատ ավելի թույլ, քան անհրաժեշտ է», - ասաց Մարգարովը:
Նա նաև չբացառեց, որ ստեղծված իրավիճակում կարող արտահերթ ընտրությունները չեղարկվեն։
«Վերջին մեկ տարվա ընթացքում Հայաստանը ապրել է կամ ռազմական, կամ արտակարգ ռեժիմում, ինչի համար կային եւ օբյեկտիվ, եւ սուբյեկտիվ պատճառներ: Հիմա չի կարելի բացառել, որ ընտրությունները կարող են հետաձգվել ռազմական դրության պատճառով: Սա աննախադեպ իրավիճակ է, երբ հակառակորդը պարզապես ներխուժել է ՀՀ տարածք: Այո, 90-ականներին եղել են տարբեր գործընթացներ, ռմբակոծվել է Հայաստանի տարածքը, սակայն սահմանի անցումը նման ձևաչափով ես չեմ հիշում», - շեշտեց քաղաքագետը:
Comments