Գյուլագարակ համայնքի ղեկավարը հրաժարական է ներկայացրել
Մհեր Գևորգյանը գրում է.
«Գյուլագարակ համայնքի սիրելի՛ բնակիչներ,
Սույն թվականի հուլիսի 20-ից վաղաժամկետ դադարացրել եմ Գյուլագարակ համայնքի ղեկավարի իմ լիազորությունները։
Համայնքապետարանի աշխատակազմի կատարած աշխատանքը վստահ եմ տվել է իր դրական արդյունքը համայնքի զարգացման գործում, այդ իսկ պատճառով խորին շնորհակալություն եմ հայտնում իմ ողջ անձնակազմին, ավագանու անդամներին, վարչական ղեկավարներին, ՀՈԱԿ-ների տնօրեններին՝ համախմբված ու արդյունավետ աշխատանքի համար։ Շնորհակալ եմ իմ բնակիչներից, իմ համագյուղացիներից այսքան տարիների միասին անցած ճանապարհի ու վստահության համար:
Ընտանիքն ինձ համար սրբություն է ու պետք է ամուր պահել սրբությունները՝ թույլ չտալով, որ «կարմիր գծեր»-ը հասնեն սխալ եզրագծերի: Անկախ ամեն ինչից, ես սկզբունքայնորեն շարունակելու եմ իմ պայքարը հայրենիքիս ամեն սանտիմետրի, հող ու ջրի և մեր պապերից ժառանգած այս սուրբ երկրի համար, որովհետև հայրենիքը, առավել ևս հիմա, յուրաքանչյուրիս կարիքն ունի: Հայ ազգը արժանի է գլուխը բարձր ապրելուն, ու ոչ մի թուրք ցեղ չի կարող ոչնչացնել այն ազգին, որն ունի արժանապատիվ ու հայեցի ոգի, պինդ ու անկոտրում հայորդիներ:
Խաղաղություն եմ ցանկանում Հայաստան և Արցախ աշխարհներին, խոնարհումս անմահացած հերոս տղերքին ու նրանց հերոսածին մայրերին: Համոզված եմ՝ մեր սերունդները դեռ կապրեն տղերքի կյանքի գնով պահված, բայց ժամանակավոր կորցված հայրենիքում:
Ես պատրաստ եմ իմ հետագա գործունեությամբ ծառայել իմ հայրենիքին ու համայնքին:
Սեր, հանդուրժողականություն, խաղաղություն ու անդորրություն եմ ցանկանում բոլորիդ ընտանիքներին:
Սիրով Ձեր՝ Մհեր Գևորգյան
Պինդ կացե՛ք...»
Comments