Վրաստանում կանցկացվի ՆԱՏՕ-ի ռազմական կոմիտեի նիստը

Հոկտեմբերի 7-8-ը Վրաստանում չորրորդ անգամ կանցկացվի ՆԱՏՕ-ի ռազմական կոմիտեի նիստը` նոր նախագահ, ծովակալ Ռոբ Բաուերի նախագահությամբ. այդ մասին տեղեկացնում է Վրաստանի պաշտպանության նախարարությունը։

Հյուսիսատլանտյան դաշինքի բարձրագույն ռազմական պաշտոնյայի այցը Վրաստան վերահաստատում է ՆԱՏՕ-ի հաստատուն աջակցությունը երկրի ինքնիշխանությանը, տարածքային ամբողջականությանը և եվրաատլանտյան ձգտումներին:

Վրաստանի մասնակցությամբ ՆԱՏՕ-ի ռազմական կոմիտեի լիագումար նիստում Հյուսիսատլանտյան դաշինքի գլխավոր ռազմական մարմնի ներկայացուցիչները կքննարկեն Վրաստանին, ինչպես նաև տարածաշրջանին սպառնացող մարտահրավերներին։ Համատեղ նիստում կքննարկվեն ՆԱՏՕ-Վրաստան ռազմական համագործակցության հարցերն ու առաջնահերթությունները՝ ներառյալ Սև ծովի անվտանգության ամրապնդման քաղաքականությունը:

Նախատեսված են նաև ՆԱՏՕ-ի ռազմական կոմիտեի նախագահի բարձր մակարդակի երկկողմ հանդիպումները Վրաստանի վարչապետի և պաշտպանության նախարարության ներկայացուցիչների հետ:

Կոմիտեի ներկայացուցիչները կայցելեն նաև ՆԱՏՕ-Վրաստան համատեղ ուսումնական կենտրոն (JTEC)՝ ծանոթանալու դաշինքի իրականացրած պաշտպանական ուժերի վերապատրաստման կարողություններին, նոր ենթակառուցվածքներին և համակարգերին:

Հիշեցնենք՝ օրեր առաջ Վրաստանի Ներքին գործերի նախարարությունը հայտնել էր Վրաստանի ջրային տարածք մուտք գործած ՆԱՏՕ-ի ​​ականազերծման խմբի հինգ նավերի մասին։