Մենք տանում ենք գյուղական դպրոցները ամրապնդելու քաղաքականություն․ Նիկոլ Փաշինյան
«Պետք է արձանագրեմ, որ կրթության ոլորտում բարեփոխումների շուրջ մեր պատկերացումներն ամբողջացրել ենք»,-այս մասին այսօր՝ մայիսի 6-ին, կառավարության նիստում հայտարարեց ՀՀ վարչապետի պաշտոնակատար Նիկոլ Փաշինյանը՝ հավելելով, որ այս ամենին մի կոմպոնենտ է ավելացել՝ ժողովրդագրական ծրագրերը, որոնք նույնպես պետք է դրվեն այս շղթայի մեջ։
«Պետք է բարձրաձայնեմ, թե որ համայնքներում ենք իրականացնում դպրոցաշինության ծրագիրը, որը մեկնարկել էինք անցած տարի, բայց պատերազմի ընթացքում գործընթացները դանդաղեցին, և հիմա մենք վերականգնում ենք ֆինանսավորումը, որպեսզի շինարարությունը շարունակվի»,-ասում է վարչապետը։
Նիկոլ Փաշինյանը հավասարապես կարևորում է կրթական ոլորտում բովանդակային և ենթակառուցվածքային փոփոխությունները՝ նշելով, որ մեկն առանց մյուսի չի կարող լինել,-«Կարևոր է ընգծել, որ մենք տանում ենք գյուղական դպրոցները ամրապնդելու քաղաքականություն ու հասկանում ենք, որ պետք է անել այնեպս, որպեսզի այնտեղ կրթության որակը մեծ խզում չունենա մայրաքաղաքի դպրոցների հետ։ Մենք իրականացնում ենք նաև ուսուցիչների ատեստավորման գործընթացը, հեռավար կրթության գործընթացը և փոփոխություններ ենք իրականացնում դեպի գյուղեր ուսուցիչների գործուղման գործընթացում»։
Comments