Անվտանգության գոտին ապահովելու հնարավորությունը կորցրել ենք. Սերյան Օհանյան
Անվտանգության գոտին ապահովելու հնարավորությունը մենք կորցրել ենք, սահմանազատումը մենք իրականացրել ենք՝ առանց պետական կամ միջազգային ընթացակարգերի, Ազատության հրապարակում լրագրողների հետ զրույցում ասաց ՀՀ պաշտպանության նախկին նախարար Սեյրան Օհանյանը: «Չեն եղել պայմաններ, չի եղել ստորագրված համապատասխան պայմանագիր, բայց մեր ԶՈւ-ն մեր երկրի կարգադրությամբ թողել է ռազմավարական բոլոր կետերը, որոնք այսօր գտնվում են Ադրբեջանի վերահսկողության տակ՝ առանց հասկանալու, որ հետագայում, երբ մենք գնանք իրական սահմանազատման, եթե պետք լինի հակառակորդին ասել՝ «պետք է քաշվեք», շատ դժվար է լինելու այդ համաձայնությանը գալ», - նշեց Օհանյանը: Նրա խոսքով՝ անփորձ մարդիկ չեն հասկանում, որ յուրաքանչյուր քայլ կատարելիս յուրաքանչյուր բանակցային կետի համար տարիներով պետք է բանակցել, սեփական տեսակետն առաջ տանել:
«Սրանք այն անփորձներն են, որոնք առանց մտածելու ասում են՝ «դե հետ քաշվեք, լավ»: Մենք ինչքա՞ն պետք է հետ քաշվենք», - ասաց նա:
Comments