Փաշինյանը վերահաստատեց՝ պատրաստ է ընդդիմադիրների հետ կիսել, քննարկել բանակցային գործընթացի վերաբեր…
Փաշինյանը վերահաստատեց՝ պատրաստ է ընդդիմադիրների հետ կիսել, քննարկել բանակցային գործընթացի վերաբերյալ տեղեկատվությունը
Armenpress.am-ը գրում է
ՀՀ վարչապետ Նիկոլ Փաշինյանը վերահաստատեց իր պատրաստակամությունը՝ ընդդիմադիր պատգամավորների հետ կիսելու, քննարկելու բանակցային գործընթացի նրբությունների վերաբերյալ տեղեկատվությունը: «Արմենպրես»-ի փոխանցմամբ՝ Փաշինյանն այս մասին ասել է «Հանրային հեռուստաընկերությանը» տված հարցազրույցում:
Անդրադառնալով ընդդիմադիր «Պատիվ ունեմ» խմբակցության՝ բոյկոտից հետո ԱԺ վերադառնալու մտադրությանը՝ Փաշինյանը նշեց, որ Հայաստանը ժողովրդավարական երկիր է: «Այո, կարող են որոշում կայացնել չմասնակցել, կարող են որոշում կայացնել՝ մասնակցել: Եվ դրան պետք է նայել բնականոն ընթացքի մեջ»,-ասաց վարչապետը:
Փաշինյանը ընդգծեց՝ և մասնակցելը, և չմասնակցելը ընդդիմադիրների իրավունքն է:
«Բանակցային գործընթացի նրբությունների վերաբերյալ տեղեկատվությունը կիսելու և քննարկումներ ունենալու իմ պատրաստակամությունը շարունակում է մնալ ուժի մեջ: Համոզված եմ՝ բանակցային գործընթացի մասին եղած տեղեկատվությանը ծանոթանալուց հետո դա որևէ մեկին հիմք չի կարող տալ ասելու, որ մենք Հայաստանի Հանրապետության շահերին հակասող որևէ գործողություն ենք ձեռնարկել»,-ասաց Փաշինյանը:
