Գունագեղ միջոցառման հետ կապված պատգամավորի (զոհվածի հոր) հարցին Փաշինյանը պատասխանեց ասմունքով
ԱԺ-կառավարություն հարց ու պատասխանի ժամանակ «Հայաստան» խմբակցության պատգամավոր Գեղամ Նազարյանը, որը նաև 44-օրյա պատերազմում զոհված Աբգար Նազարյանի հայրն է, Անկախության օրը նախատեսվող համերգի առնչությամբ հարց ուղղեց վարչապետ Նիկոլ Փաշինյանին։
«Միգուցե անհետ կորածների հարցերով զբաղվող հանձնաժողով ստեղծեինք և 2 միլիոնն էլ հատկացնեինք, որ ավելի լավ զբաղվեինք»,- ասաց նա։
Ի պատասխան Փաշինյանը նշեց, որ անհետ կորածների հարցերով զբաղվող մարմին կա, որն անձամբ ինքն է համակարգում։
«Անհետ կորածների հարցով բոլոր հնարավոր միջոցներն արվում են։ Ինչ վերաբերում է գունագեղ և Անկախության օրվան նվիրված միջոցառումներին, ապա ուզում եմ ներողություն խնդրել բոլոր այն մարդկանցից, ում զգացմունքները վիրավորել կամ խոցել եմ նման ձևակերպմամբ»,- նշեց Փաշինյանը։
Նրա խոսքով` այդ օրը պետք է նշել ՀՀ դրոշներով, իսկ մեր դրոշի գույները վառ են, և նա չի կարծում, որ պետք է չեղարկեն դրոշի գույները։
Փաշինյանը հավելեց, որ նախատեսվող միջոցառման առանցքը հենց զոհերի հիշատակի ընդգծումն է, և այդ օրը հայտարարվելու է 3 պատերազմներում իրենց կյանքը զոհածների մասին մի մասշատաբային նախագծի մեկնարկի մասին։
Խոսքի վերջում Փաշինյանն ասմունքեց Հովհաննես Թումանյանի «Հայրենիքիս հետ» բանաստեղծությունը։
Comments