Քոչարյանի և մյուսների գործով կարճման վերաբերյալ բողոքների քննությունը հետաձգվեց

Վերաքննիչ դատարանը հետաձգեց ՀՀ երկրորդ նախագահ Ռոբերտ Քոչարյանի և մյուսների գործով կարճման վերաբերյալ բողոքների քննությունը:

Այս մասին հաղորդագրություն է տարածել Քոչարյանի փաստաբանական թիմը:

Նախկին փոխվարչապետ Արմեն Գևորգյանի փաստաբան Էրիկ Ալեքսանյանը միջնորդել է հետաձգել դատական նիստն այն պատճառաբանությամբ, որ մայիսի 24-ից մինչև հունիսի 9-ը ներառյալ գտնվելու է արձակուրդում։

Քոչարյանի պաշտպաններ Հայկ Ալումյանը և Հովհաննես Խուդոյանը միացան միջնորդությանը և խնդրեցին հետաձգել նիստը` նշելով, որ Ալեքսանյանը, հնարավոր է, բողոքների հետ կապված ասելիք ունենա։ Դատարանը որոշում կայացրեց հետաձգել դատական նիստը մինչև հունիսի 24-ը, ժամը 14։00։