Քոչարյանը խոսեց առաջիկա և նախորդ բոլոր ընտրությունների տարբերության մասին
- Jun 10, 2021
- 1 min read
ՀՀ երկրորդ նախագահ, «Հայաստան» դաշինքի ցուցակը գլխավորող Ռոբերտ Քոչարյանն առանձնացրեց առաջիկա արտահերթ խորհրդարանական ընտրությունները մնացած բոլոր ընտրություններից տարբերող երկու գործոն: Քոչարյանը այս մասին խոսեց քարոզարշավի շրջանակում ապարանցիների հետ հանդիպմանը:
«Այս ընտրությունները տարբերվում են Հայաստանում կայացած մնացած բոլոր ընտրություններից: Հիմնական գործոնը, որը տարբերում է այս ընտրությունները, այն անվտանգային միջավայրն է, որն անցյալ ընտրությունների ժամանակ մենք չենք ունեցել: Մենք իրականում ավելի անվտանգ էինք զգում, ոչ ոք սահմաններից չէր խոսում, մենք հաղթանակած երկիր էինք: Եվ այդ տեսանկյունից այլ տրամադրությունների մեջ ենք եղել: Հիմա լրիվ այլ իրավիճակ է: Անցած բոլոր ընտրությունների ժամանակ արժեքային համակարգի խարխլման մասին ևս չէինք խոսում, այդ կասկածը չկար, որ մեր արժեքային համակարգից ինչ-որ բան են գողանում, մեզ փորձում են վերափոխել, այլ տեսակ դարձնել»,-ասաց Քոչարյանը:
Նա կարծիք հայտնեց, որ անվտանգության հետ կապված հարցերը և ազգային արժեքային համակարգի խարխլումը զուգահեռ են առաջացել, միասին են քայլում հիմա:
Քոչարյանը հարց առաջ քաշեց. «Ուղղակի այդպե՞ս է ստացվել, թե՞ մտածված քաղաքականություն է իրականացվել՝ այս երկու ուղղություններով՝ կոտրելու մեր կյանքը, մեր տեսակը, որն անխուսափելիորեն բերում է պարտության, հայրենասիրության նվազեցման»:
Ըստ նրա՝ այդ քաղաքականությունը 2018-ից սկսած վարել է գործող իշխանությունը՝ շեշտելով, որ այդ ուժը պետք է հեռանա: Քոչարյանը կարծում է, որ գործող իշխանության պաշտոնավարումը շարունակվելու դեպքում կորուստները չեն սահմանափակվելու եղածով:
«Հնարավոր չէ այս տարածաշրջանում ապրել՝ առանց պետականության նկատմամբ յուրահատուկ վերաբերմունքի, հնարավոր չէ այս տարածաշրջանում ապրել՝ առանց մարտունակ բանակի»,-ասաց Քոչարյանը:
Նրան զարմացնում է, որ հեռուստատեսությամբ, լրատվամիջոցներով մարդիկ ի պաշտպանություն գործող իշխանության են արտահայտվում: Քոչարյանը փորձեց հիմնավորել, թե ինչու մարդիկ պետք է ընտրեն «Հայաստան» դաշինքին՝ շեշտելով իրենց ուժի գիտելիքների, փորձի, վճռականության և կամքի մասին: «Ես 10 տարի նախագահ եմ եղել և այդ տարիների ընթացքում երկրի տնտեսությունն աճել է երկնիշ թվերով»,-ասաց նա:
Comments