Ով է Գյումրու քաղաքապետի ՔՊ թեկնածուն․ «Հրապարակ»
- Aug 24, 2021
- 1 min read
«Հրապարակ»-ի տեղեկություններով՝ իշխող «Քաղաքացիական պայմանագիր» կուսակցությունը աշնանը կայանալիք ՏԻՄ ընտրություններին Գյումրու քաղաքապետի թեկնածու է առաջադրելու Շիրակի գործող մարզպետ Հովհաննես Հարությունյանին։
Իշխանական մեր աղբյուրի փոխանցմամբ ՝ խմբակցության ներսում երկար քննարկումներ են ծավալվել, և ի վերջո ընտրությունը կանգ է առել Հարությունյանի վրա։
«Նազելի Բաղդասարյանին էլ են դիտարկել, բայց նրա գործունեությունն ԱԺ-ում անհրաժեշտությունն է, չէին կարող»,- ասաց զրուցակիցը, ինչ վերաբերվում է իմքայլական նախկին պատգամավոր Կարեն Սարուխանյանին, ապա նրա թեկնածության առաջադրումը խմբակիցների շրջանում լուրջ տարաձայնությունների առիթ է դարձել։
Ի դեպ, մարզպետ Հովհաննես Հարությունյանը մեր հեռախոսազանգերն անպատասխան թողեց։ Հանրապետության երկրորդ քաղաքում ընտրական թեժ պայքար է սպասվում։ Քաղաքապետի հավանական թեկնածուների թիվն օր օրի ավելանում է։
Ըստ տեղեկությունների՝ կառաջադրվեն մոտ 10 թեկնածու՝ ինչպես իշխանական, այնպես էլ ընդդիմադիր և անկուսակցական թևերից։
ՀՀԿ-ն չի բացառվում, որ առաջադրի նախկին քաղաքապետ Վարդան Ղուկասյանի թեկնածությունը, «Պատիվ ունեմ»-ի թեկնածուն նախկին պատգամավոր Մարտուն Գրիգորյանն է, «Հայաստան» դաշինքը, ըստ շրջանառվող լուրերի, Գյումրու քաղաքապետի թեկնածուի համար բանակցում է ԱԺ աշխատակազմի ղեկավարի նախկին տեղակալ Արսեն Բաբայանի հետ։
Comments