Որոշ սպաներ շարում են զորքը և հրահանգում քվեարկել կապիտուլյանտի օգտին․ Թեհմինա Վարդանյան

Գործող վարչակազմը պարբերաբար խոչընդոտում է «Պատիվ ունեմ» դաշինքի աշխատանքները։ Այս մասին այսօր հրավիրված ասուլիսում հայտնեց «Պատիվ ունեմ» դաշինքի պատգամավորի թեկնածու Թեհմինա Վարդանյանը։

Նրա խոսքով՝ դաշինքի թեկնածուների և շտաբերի ներկայացուցիչների նկատմամբ հետապնդումներ են սկսվել, մարդկանց հրավիրում են բաժիններ, երբեմն անգամ առանց փաստաթղթի։

«Այս ամենը կապիտուլյանտի մոտ սրվել է հատկապես վերջին երկու օրերի ընթացքում։ Հիմա լայնածավալ տեռոր է իրականացվում մեր շտաբի ներկայացուցիչների հանդեպ, և նպատակը մեկն է՝ խոչընդոտել և պարալիզացնել մեր աշխատանքները»,- ասաց նա։

Ըստ Թեհմինա Վարդանյանի՝ իշխանությունը լկտիաբար օգտագործում է վարչական լծակ։

«Մասնավորապես, զինվորականների կողմից է օգտագործվում այդ լծակը։ Որոշ սպաներ շարում են զորքը և տեղամաս մտնելուց առաջ հրահանգում քվեարկել կապիտուլյանտի օգտին»,- նշեց նա։

Բացի այդ, Թեհմինա Վարդանյանը նշեց, որ մարզերում մարզպետներն ու համայնքների ղեկավարները կանգնում են տեղմասերի դիմաց՝ փորձելով վախեցնել ու ուղղորդել քաղաքացիներին։