Ավինյանի համար «չեզոք» պաշտոն են նախատեսել. նրա քաղաքական կարիերան չի ավարտվում. «Փաստ»

Aug 3, 2021
1 min read

Չնայած նախատեսված 15-օրյա ժամկետին, հենց երեկ՝ վարչապետ նշանակվելուց անմիջապես հետո, Նիկոլ Փաշինյանը սկսել է կառավարության ձևավորման պրոցեսը: Արդեն հայտնի է, որ փոխվարչապետ Տիգրան Ավինյանն ընդգրկված չի լինի գործադիրում: «Փաստ» օրաթերթը գրում է, որ նրա անվան հետ կապված տարբեր լուրեր են շրջանառվում:

Լրատվամիջոցը երեկ ստացել է տեղեկություն, որ, ամենայն հավանականությամբ, Ավինյանը կնշանակվի «Անիվ» ՈւՎԿ-ի միակ բաժնետեր ու մասնակից՝ գյուղական վայրերում փոքր և միջին ձեռնարկատիրության խթանման «Անիվ» հիմնադրամի գործադիր տնօրեն:

Ինչպես նշված է կազմակերպության կայքում, այս հիմնադրամը «հանդիսանում է «Շեն» բարեգործական հասարակական կազմակերպության կամավոր գույքային վճարների հիման վրա ստեղծված և անդամություն չունեցող ոչ առևտրային կազմակերպություն, որի գործունեությունն ուղղված է ՀՀ հեռավոր գյուղական վայրերում գործող և նոր ստեղծվող տնտեսվարող սուբյեկտների տնտեսական գործունեության խթանմանը, և որի նպատակն է ՀՀ գյուղական բնակչության կենսամակարդակի բարելավումը, եկամուտների ավելացումը, գործազրկության և արտագաղթի կրճատումը»: