Անկարան թյուրքական ԵԱՏՄ է կառուցում՝ ձեռնոց նետելով ՌԴ-ին

Թյուրքական խորհրդի հաջորդ հանդիպումը կկայանա 2021թ. նոյեմբերի 12-ին Ստամբուլում: Այդ մասին հայտարարել է Թուրքիայի ԱԳ նախարար Մևլութ Չավուշօղլուն:

Նա նշել է, որ հաջորդ նիստին Թուրքմենստանը դիտորդի կարգավիճակ է ստանալու Թյուրքական խորհրդում: Այս պահին Թյուրքական խորհրդի մեջ են մտնում Ադրբեջանը, Ղազախստանը, Ղրղզստանը և Թուրքիան:

Անկարան թյուրքական ԵԱՏՄ է կառուցում՝ ձեռնոց նետելով առաջին հերթին ՌԴ-ին, ինչպես նաև թյուրքախոս, գազով ու նավթով հարուստ Կենտրոնական Ասիայում գեոպոլիտիկ շահեր ունեցող Չինաստանին: Մեծ Թուրան կառուցելու ճանապարհին Անկարան ստեղծում է հարթակներ․ Թյուրքական խորհուրդն Անկարայի համար իր պանթուրքական, նեոօսմանական, պանիսլամական շահերն առաջ մղելու գործիք է:

Հիշեցնենք, որ Ղազախստանն ու Ղրղզստանը ՀԱՊԿ ու ԵԱՏՄ-ի անդամ երկրներ են, Ղրղզստանում են տեղակայված ռուսական զորքերն, ու Անկարան փորձում է այդ երկրները դուրս բերել ռուսական ազդեցության գոտուց:

Ինչ վերաբերում է Թուրքմենստանին, ապա Անկարային հետաքրքրում են թուրքմենական նավթն ու գազը: Թուրքմենստանը պայմանագիր է կնքել ադրբեջանական SOCAR ընկերության հետ՝ այդ երկրի տարածքով դեպի Թուրքիա նավթ արտահանելու հետ կապված: Անկարան ցանկանում է հսկողություն սահմանել Կենտրոնական Ասիայի նկատմամբ, ինչը հարվածում է նաև Չինաստանին, որը տասնյակ միլիարդավոր դոլարներ է ներդրել այդ թվում Ղազախստանում և Ղրղզստանում: Չինաստանի տնտեսության համար կարևոր են Կենտրոնական Ասիայի նավթն ու գազը:

Թյուրքական խորհրդի միջոցով Անկարան ցանկանում է ամրապնդվել Կասպից ծովի երկու ափերին, Կովկասում, Կենտրոնական Ասիայում, իսկ ապագայում տարածքային նկրտումներ ունենալ նաև Չինաստանի՝ թյուրքաբնակ Սինցզյան-Ույղուրական շրջանի, Իրանական Ադրբեջանի, ՌԴ-ի՝ թյուրքաբնակ բազմաթիվ մարզերի և հանրապետությունների նկատմամբ (Թաթարստան, Հյուսիսային Կովկաս և այլն):

Այսպիսով, Անկարան թյուրքական աշխարհը միավորելու հայտ է ներկայացրել՝գերտերության վերածվելու համար: Անկարան իր արտաքին քաղաքականությամբ որդեգրել է պանթուրքական, պանիսլամական, նեոօսմանական ուղենիշներ՝ գեոպոլիտիկ շահեր ունենալով Հյուսիսային Աֆրիկայում, Բալկաններում, Մերձավոր Արևելքում, Կովկասում, Կենտրոնական Ասիայում՝ ներառյալ Աֆղանստանը:

Արտյոմ Բալասանով