Ապօրինի ծառահատման, ապա փախուստի հետևանքը` 2 զոհ

Երեկ` օգոստոսի 14֊ին Լոռիում ոստիկանների «կանգ առ» հրահանգին չենթարկվելով՝ կոճղերով բարձված Ford-ը կողաշրջվել է. կա 2 զոհ, դեպքի վայրում հարձակվել են ոստիկանների վրա, վառել են ոստիկանական «06»-ն ու ջարդել УАЗ-ը։

Դեպքի մանրամասները MediaHub.am-ը փորձեց ճշտել ոստիկանությունից։

Ոստիկանության հասարակայնության հետ կապի և լրատվության վարչության ԶԼՄ-ների հետ կապի, վերլուծության և լրատվության բաժնի պետ Զարզանդ Գաբրիելյանը մեզ հետ զրույցում նշեց, որ ապօրինի ծառահատումների և բնապահպանական ոլորտի հանցագործությունների դեմ իրականացվող կանխարգելիչ միջոցառումների նպատակով ոստիկանության Թումանյանի բաժնի հաշվեկշռում գտնվող ոստիկանական տարբերանշաններով և փարոսիկներով կահավորված «ՈՒԱԶ» մակնիշի ավտոմեքենայով ծառայություն կատարելու ժամանակ ոստիկանության ծառայողներն օգոստոսի 14-ին ժամը 20.30-ի սահմաններում Մարց գյուղի վերևի մասի անտառի հատվածում նկատել են ակնհայտ բեռնված «Ֆորդ Տրանզիտ» մակնիշի առանց հաշվառման համարանիշերի ավտոմեքենա, որը բարձրախոսի միջոցով բարձրաձայնելով փորձել են կանգնեցնել, սակայն այն բարձր արագությամբ հիշյալ վայրից դիմել է փախուստի։

«Ոստիկանության ծառայողները բարձրախոսով ներկայանալով որպես ոստիկանության ծառայողներ` անընդհատ հորդորել են, որ փախուստի դիմող ավտոմեքենան կանգ առնի։ Շարունակելով փախուստը՝ Մարց գյուղի հատվածում «Ֆորդ Տրանզիտ» մակնիշի ավտոմեքենան բախվել է ճամփեզրին կայանված այլ ավտոմեքենայի և բարձր արագությամբ շարունակելով ճանապարհը, Լորուտ գյուղի մոտակայքում շրջադարձ կատարելու ժամանակ կորցնելով կառավարումը և ընկել է մոտակա ձորակը, ինչի հետևանքով երկու ուղևորները տեղում մահացել են։

Ժամը 21.10-ի սահմաններում Լորուտ և Մարց գյուղերի մի խումբ բնակիչներ հավաքվել են նշված տարածքում, վիճաբանել ոստիկանության ծառայողների հետ, որի ընթացքում մարմնական վնասվածքներ են պատճառել վերջիններիս, «ՈՒԱԶ» մակնիշի ավտոմեքենան հրելով գցել են մոտակա ձորը, ինչպես նաև հրկիզման եղանակով այրել են «Իքատակ» հանդամասում ծառայություն իրականացնելու նպատակով կայանված՝ ոստիկանության Թումանյանի բաժնի հաշվեկշռում գտնվող «ՎԱԶ 2106» ավտոմեքենան»,- ասաց նա։

Զարզանդ Գաբրիելյանը փոխանցեց, որ դեպքի առնչությամբ Թումանյանի քննչական բաժնում հարուցվել է քրեական գործ։ ՀՀ ոստիկանության ներքին անվտանգության վարչությունում անցկացվում է ծառայողական քննություն։