Ոստիկանների կողմից Զարուհի Փոստանջյանին ծեծի ենթարկելու գործով նշանակվել է ծառայողական քննություն
- May 21, 2021
- 1 min read
Զարուհի Փոստանջյանը առողջական վիճակի կտրուկ վատթարացման հետևանքով (մարմնական վնասվածքներ, սրտխառնոց, սրտխփոց, գլխապտույտ, գլխացավ, մարմնի տարբեր հատվածներում ուժեղ ցավ, և այլ անոմալիաներ) տեղափոխվել է հիվանդանոց։ Այս մասին հայտնել են «Երկիր Ծիրանի» կուսակցությունից։
MediaHub.am-ի հետ զրույցում ոստիկանության հասարակայնության հետ կապի և լրատվության վարչության ԶԼՄ-ների հետ կապի, վերլուծության և լրատվության բաժնի պետ Զարզանդ Գաբրիելյանը հայտնեց, որ նշված դեպքով ոստիկանության Քանաքեռ-Զեյթունի բաժնում նյութեր են նախապատրաստվում։ Նշանակվել է ծառայողական քննություն։
Հիշեցնենք, որ ավելի վաղ կուսակցությունից հայտնել էին, որ մայիսի 20-ին ոստիկանները՝ ապօրինի ուժ կիրառելով, ապօրինի ազատությունից զրկելով, բերման են ենթարկել Զարուհի Փոստանջյանին՝ նրան պատճառելով մարմնական վնասվածքներ, ինչպես նաև բռնություն են կիրառել վերջինիս նկատմամբ։ Խախտվել է նաև Փոստանջյանի խոսքի և հավաքների ազատության իրավունքները:
Comments