ԵԽԽՎ զեկույցում կոչ է արվում անհապաղ վերադարձնել բոլոր հայ գերիներին և այլ պահվող անձանց. Ռուբինյան

Ազգային ժողովում այսօր հրավիրվել է մամուլի ասուլիս ԵԽԽՎ հայկական պատվիրակության անդամների մասնակցությամբ․ այն վերջերս է վերադարձել Ստրասբուրգից:

ԱԺ փոխնախագահ Ռուբեն Ռուբինյանը տեղեկացրեց, որ ԵԽԽՎ-ում քննարկվել է Հայաստանի համար հետաքրքրություն ներկայացնող երկու զեկույց:

«Առաջինը Հայաստանում արտահերթ խորհրդարանական ընտրությունների վերաբերյալ զեկույցն էր, որով ՀՀ-ում անցկացված ընտրությունները գնահատվեցին մրցակցային և լավ կազմակերպված: Երկրորդը ԼՂ հակամարտության հումանիտար հետևանքների վերաբերյալ զեկույցն էր, որում տեղ են գտել բոլոր այն մտահոգությունները, որ մենք ունենք: Զեկույցում ֆիքսվում է, որ պատերազմը հակամարտող կողմերի՝ ԵԽ անդամ լինելու ստանձնած պարտավորությունների խախտում է, և ԵԽԽՎ-ն պետք է ուսումնասիրի այդ հարցը»:

Ռուբինյանի խոսքով՝ զեկույցում հստակ կոչ է արվում անհապաղ վերադարձնել բոլոր հայ գերիներին և այլ պահվող անձանց:

«Ֆիքսվում է Թուրքիայի աջակցությամբ կամ Թուրքիայի մասնակցությամբ սիրիացի վարձկանների տեղափոխումը Ղարաբաղ և մասնակցությունը պատերազմին: Ֆիքսվում է և հստակ կոչ է արվում Ադրբեջանին անհապաղ վերադարձնել բոլոր ռազմագերիներին և պահվող անձանց, անկախ այն կարգավիճակից, որ տրված են այդ անձանց Ադրբեջանում:

Խոսվում է նաև հայկական մշակութային ժառանգությանը սպառնացող վտանգների մասին, դատապարտվում է Ադրբեջանում ծավալվող կեղծ ալբանական թեզի գոյությունը: Անդրադարձ կա նաև Ադրբեջանում պաշտոնական և բարձր մակարդակով օգտագործվող ատելության խոսքին»,- հավելեց ԵԽԽՎ-ում հայաստանյան պատվիրակության ղեկավարը: