Ընտրակաշառքների հետ կապված այս պահի դրությամբ որևէ ռեալ դեպք չի արձանագրվել. փոխոստիկանապետ

Ընտրակաշառքների հետ կապված այս պահի դրությամբ որևէ ռեալ դեպք չի արձանագրվել։ Այս մասին այսօր՝ հունիսի 1-ին, լրագրողների հետ զրույցում ասաց փոխոստիկանապետ Արա Ֆիդանյանը։

«Եթե չեմ սխալվում, 27 նյութեր են նախապատրաստվում եւ ուսումնասիրություններ են կատարվում, այդ թվում՝ 14-ը գույքի վնասման հետ կապված էր, պաստառների վնասում։ Նշեմ, որ այդ 14-ից 12-ը կոնկրետ անձին պատկանող պաստառներ էին, որոնցից 5-ն արդեն իսկ բացահայտվել են»,- ասաց Ֆիդանյանը։

Լրագրողի այն դիտարկմանը, որ իշխանությունը լծված է ագրեսիվ քարոզարշավի, քաղաքացիների վրեժի մասին է հայտարարվում, հարցին՝ արդյոք նման հայտարարությունները չե՞ն անհանգստացնում ոստիկանությանը, փոխոստիկանապետը պատասխանեց. «Այն բոլոր հայտարարությունները, որոնք տարբեր քաղաքական ուժեր կատարում են միանշանակ մեր կողմից ուսումնասիրվում են։ Իրենց ցանկությամբ կձեռնարկենք նաեւ հանդիպումների շարք բոլոր կուսակցությունների ներկայացուցիչների հետ, թե կանխարգելիչ, թե այլ բնույթի հարցերի քննարկմանը»։