Արթուր Վանեցյանի հայցն ընդդեմ ԱԺ պատգամավոր Գագիկ Մելքոնյանի մուտքագրվել է դատարան

ԱԺ «Պատիվ ունեմ» խմբակցության ղեկավար Արթուր Վանեցյանի պաշտպանը հայց է ներկայացրել դատարան՝ ընդդեմ «Քաղաքացիական պայմանագիր» խմբակցության պատգամավոր Գագիկ Մելքոնյանի։ Արթուր Վանեցյանը պահանջում է, որ Մելքոնյանը հրապարակայնորեն հերքի զրպարտություն հանդիսացող փաստացի տվյալները և փոխհատուցի պատվին ու արժանապատվությանը պատճառված վնասը։ Այդ մասին տեղեկանում ենք «Դատալեքս» տեղեկատվական համակարգից։

Արթուր Վանցեյանը Գագիկ Մելքոնյանից պահանջում է հերքել Հանրային հեռուստաընկերության եթերում հայտնած զրպարտչական հայտարարությունները։

Արթուր Վանցեյանի շահերը ներկայացնող Լուսինե Սահակյանը ֆեյսբուքյան գրառմամբ հայտնել էր․

««Քաղաքացիական պայմանագիր» կուսակցության ցուցակով ԱԺ պատգամավոր դառնալն անգամ չի ազատում գեներալի ուսադիրներ կրող անձին՝ մտածել խոսելուց առաջ ու հաշիվ տալ իրեն արտահայտած մտքերի համար»։

Նույն աղբյուրում դեռևս առկա չէ, թե որ դատավորին է մակագրվել գործի քննությունը, Իսկ Հանրային հեռուստաընկերությունը հրավիրվել է դատարան՝ որպես երրորդ կողմ։