Հավանական է մեր տղաները փորձեն գերի վերցնել ադրբեջանցիներին, հետո նրանք կփորձեն պատասխանել․ Փաշինյան

«Լուսավոր Հայաստան» կուսակցության նախաձեռնությամբ այսօր տեղի ունեցավ ԱԽ արտահերթ նիստ։ ՀՀ վարչապետի պաշտոնակատար Նիկոլ Փաշինյանը նիստի ընթացքում անդրադարձավ վերջին տասնհինգ օրվա հայ-ադրբեջանական սահմանային լարվածությանն ու նշեց, որ այդ լարվածությունը դեռ կա և շարունակելու է դինամիկ աճ գրանցել, որովհետև վերջին օրերի իրադարձության արդյունքում ոչ միայն ադրբեջանական զորքն է ներթափանցում գործել, այլև մեր զինված ուժերի ստորաբաժանումները։

«Երկու կողմերը գտնվում են ոչ միայն դեմ դիմաց վիճակում, այլև խառը փոխներթափանցված են»,- նշել է Փաշինյանը։

Վարչապետի պաշտոնակատարը ասաց, որ հավանական է՝ մեր տղաները փորձեն գերի վերցնել ադրբեջանցիներին, հետո նրանք կփորձեն պատասխան քայլ անել։

«Իմ գնահատականը այն է, որ մեր՝ իրավիճակը չհանգուցալուծելու պարագայում այս սադրանքը կարող է վերածվել լայնածավալ բախման»,- ասել է Նիկոլ Փաշինյանը

Փաշինյանի պնդմամբ ինքն ունի խաղաղ դիվանագիտական հանգուցալուծում, ըստ որի երկու կողմերի զինված ուժերը հայելային եղանակով պետք է հեռանան սահմանից և վերադառնան իրենց մշտական տեղակայման վայրեր։ Իսկ դրա փոխարեն Նիկոլ Փաշինյանն առաջարկում է այդ սահմանային հատվածներում տեղակայվեն միջազգային դիտորդներ, օրինակ Ռուսաստանը կամ ԵԱՀԿ ՄԽ-ի ներկայացուցիչները։ Ընդ որում, Փաշինյանն այս առաջարկով դիմել է ոչ միայն միջազգային դիտորդներին, այլև Ադրբեջանին։

«Խոսքը վերաբերում է Սոթքից մինչև Խոզնավար հատվածում բոլոր ուժերի դուրս բերմանը, հույս ունեմ, որ առաջարկը կընդունվի» ,- եզրափակել է Նիկոլ Փաշինյանը։