Մխիթարյանի գոլն օգնեց «Ռոմա»-ին չպարտվել

Իտալիայի ֆուտբոլի առաջնության ընթացիկ մրցաշրջանի վերջին տուրում «Ռոմա»-ն մրցեց «Սպեցիա»-ի հետ:

Մեկնարկից րոպեներ անց «Սպեցիա»-ն գնդակի արագ խաղարկումից հետո բացեց հանդիպման հաշիվը: Աչքի ընկավ Դանիելե Վերդեն: Մինչ թիմերը կգնային ընդմիջման, տան տերերը խփեցին նաև երկրորդ գնդակը` գոլն իր ակտիվում գրանցեց Տոմատ Պոբեգան: «Ռոմա»-ին հաջողվեց երկրորդ կեսում խուսափել պարտությունից:

Նախ 52-րդ րոպեին հաշվի տարբերությունը կրճատեց Ստեֆան էլ Շարավին, այնուհետ` 85-րդ րոպեին Հայաստանի ֆուտբոլի ազգային թիմի կիսապաշտպան Հենրիխ Մխիթարյանը փրկեց «Ռոմա»-ին պարտությունից: «Սպեցիա»-«Ռոմա»` 2:2:

Մխիթարյանը «Ռոմա»-ի կազմում Սերիա Ա-ում մասնակցեց 34 հանդիպման, դարձավ 13 գոլի և 11 արդյունավետ փոխանցման հեղինակ:

«Ռոմա»-ն Սերիա Ա-ի մրցաշարային աղյուսակում զբաղեցրեց 7-րդ հորիզոնականը: