«Օրենքով գող» Օշականցի Գևորիկը 50 միլիոն դրամ գրավի դիմաց ազատ կարձակվի․ «Հայկական ժամանակ»
«Հայկական ժամանակ»-ի տեղեկություններով՝ «Օրենքով գող» Օշականցի Գևորիկ մականունով հայտնի Գևորգ Մելիքյանը 50 միլիոն դրամ գրավի դիմաց ազատ կարձակվի:
Երևան քաղաքի ընդհանուր իրավասության դատարանը՝ դատավոր Մարինե Մելքոնյանի նախագահությամբ, այսօր բավարարել է պաշտպանական կողմի միջնորդությունը և Մելիքյանի նկատմամբ այլընտրանքային խափանման միջոց ընտրել գրավը: 50 միլիոն դրամը դատարանի դեպոզիտ հաշվին վճարելուց հետո Մելիքյանն ազատ կարձակվի:
Գեւորգ Մելիքյանի պաշտպան Մնացական Մարուքյանը «Հայկական Ժամանակի» հետ զրույցում միայն ասաց, որ իր պաշտպանյալը գրավի դիմաց ազատ կարձակվի:
«Օրենքով գողը», հիշեցնենք, մեղադրվում է ՀՀ քրեական օրենսգրքի 223.1-րդ հոդվածի 1-ին մասով, այսինքն՝ հանցավոր համագործակցություն ստեղծելը կամ հանցավոր համագործակցություն ղեկավարելը։
Ըստ մեղադրական եզրակացության՝ Գևորգ Մելիքյանը, համարվելով հեղինակության, կատարել է քրեական ենթամշակույթ կրող խմբավորման հետապնդած նպատակների իրականացմանն ուղղված գործողություններ, մասնավորապես ստանձնել է մասնավոր, այն է՝ պարտք մնացած գումարի վերադարձման խնդրին վերաբերող վեճի՝ իր անօրինական ազդեցությունն օգտագործելու և սպառնալիքի միջոցով իրեն դիմած անձի օգտին լուծելու հարցը:
Comments