Մեկ շաբաթում աշխարհում ավելի քան 2,6 մլն մարդ Է վարակվել Covid-19- ով․ ԱՀԿ

Անցյալ շաբաթ աշխարհում արձանագրվել են կորոնավիրուսով վարակման ավելի 2,6 միլիոն դեպք և ավելի քան 57 հազար մահացու վախճան: Նախորդ յոթ օրվա համեմատությամբ հիվանդացությունն ավելացել Է 2 տոկոսով, մինչդեռ մահացությունը նվազել Է 10 տոկոսով և ամենացածր ցուցանիշին հասել անցյալ տարվա նոյեմբերից ի վեր, հունիսի 30-ին հայտնել Է Առողջապահության համաշխարհային կազմակերպությունը (ԱՀԿ):

«Հիվանդացությունը մնում Է շատ բարձր: Անցյալ շաբաթ օրական միջին հաշվով հիվանդացել Է ավելի քան 370 հազար մարդ»,- նշել Է ԱՀԿ-ն իր շաբաթական համաճարակաբանական տեղեկագրում: «Մահերի թիվը շարունակել Է նվազել: Արձանագրվել Է ավելի քան 57 հազար մահ շաբաթվա ընթացքում, ինչը 10 տոկոսով պակաս Է, քան մեկ շաբաթ առաջ, և դա մահացության ամենացածր ցուցանիշն Է 2020 թվականի նոյեմբերից ի վեր»:

Շաբաթվա ընթացքում աշխարհում արձանագրվել են 2 600 313 նոր վարակվածներ և 57 603 մահացու վախճան: Հունիսի 27-ի դրությամբ ընդամենը եղել Է ախտահարման 180 492 131 դեպք և հիվանդների մահվան 3 916 771 դեպք: Անցյալ շաբաթ հիվանդացությունը նվազել Է Արեւմտա-խաղաղօվկիանոսյան տարածաշրջանում (6 տոկոսով) և Հարավ - արևելյան Ասիայում (5 տոկոսով), դրա հետ մեկտեղ աճ Է արձանագրվել Աֆրիկայում (34 տոկոսով), Արևելյան Միջերկրականում (13 տոկոսով) եւ Եվրպայում (10 տոկոսով):

Մահացությունն աճել Է Աֆրիկայում (42 տոկոսով), բայց կրճատվել Է Հարավ - արևելյան Ասիայում (33 տոկոսով), Արեւմտա - խաղաղօվկիանոսյան տարածաշրջանում (13 տոկոսով), ինչպես նաև Հյուսիսային և Հարավային Ամերիկայում (2 տոկոսով) և Եվրոպայում (1 տոկոսով): Եվրոպայում յոթ օրում վարակվել Է ավելի քան 372 հազար մարդ և մահացել ավելի քան 6 հազարը: Հյուսիսային և Հարավային Ամերիկայում արձանագրվել Է ախտահարման ավելի քան 1,1 միլիոն նոր դեպք և 30 հազարից ավելի մահացու վախճան: Հարավ - արևելյան Ասիայում բժիշկները հայտնաբերել են ավելի քան 573 հազար վարակվածներ, մահացել Է 13 հազարից ավելի մարդ:

ԱՀԿ-ի տվյալների համաձայն՝ շարունակվում Է կորոնավիրուսիայն շտամների տարածումը, որոնք դասվում են «անհանգստություն հարուցող տարբերակների» թվին: Մասնավորապես, «Ալֆա» շտամը, որը 2020 թվականի սեպտեմբերին հայտնաբերվել Է Մեծ Բրիտանիայում, հունիսի 29-ի դրությամբ կա 172 երկրներում (երկու երկրով ավելի, քան մեկ շաբաթ առաջ):

«Բետա» տարբերակը, որն սկզբնապես հայտնաբերվել Է Հարավաֆրիկյան Հանրապետությունում, այժմ շրջանառում Է 120 պետություններում, մինչդեռ մեկ շաբաթ առաջ դրանց թիվը եղել Է 119: «Գամմա» շտամը, որը սեպտեմբերին հայտնաբերվել Է Բրազիլիայում, յոթ օրում իր աշխարհագրությունն ընդլայնել Է 71-ից մինչեւ 72 պետություն: Իր հերթին «Դելտա» տարբերակը, որը մասնագետներին հայտնի Է 2020 թվականի սեպտեմբերից Հնդկաստանում այն հայտնաբերվելուց հետո, մեկ շաբաթում ներթափանցել Է 11 նոր երկիր, և դրանց թիվը հասել Է 96-ի, հաղորդել Է ՏԱՍՍ-ը: